މެދުއިރުމަތީގައި ހަނގުރާމައިގެ ބިރުވެރިކަން އިތުރުވަމުންދާއިރު، ތިންވަނަ ބޮޑު ހަނގުރާމައެއް ފެށިދާނެކަމުގެ ބިރުވެރިކަން އެއީ މިހާރު ދުރުކަމެއްނޫނެވެ. ތެޔޮ، ކާބޯތަކެތި އަދި އަސާސީ ބޭނުންތަކަށް ބޭނުންވާ ތަކެތި އެތެރެކުރުމަށް މުޅިން ބަރޯސާވެފައިވާ ދިވެހިރާއްޖެ ފަދަ ޤައުމަކަށް، މިފަދަ ދުނިޔެވީ ހަމަނުޖެހުމަކުން ނުރައްކާތެރި އިޤްތިޞާދީ ޝޮކްތަކެއް ކުރިމަތިވާނެއެވެ.

ދުނިޔޭގައި ދެވަނައަށް އެންމެ ގިނައިން ގުދުރަތީ ގޭސް ރިޒާވްތައް ހުރި ޤައުމު ކަމުގައިވާ އީރާން، މިހާރު ވަނީ ސިޔާސީ ގޮންޖެހުންތަކުގެ މެދުތެރޭގައެވެ. އެހެން ޤައުމުތަކުން އީރާނަށްވުރެ ގިނައިން ގޭސް އެކްސްޕޯޓް ކުރިކަމުގައި ވިޔަސް، އީރާން ހިމެނޭ އެއްވެސް ހަނގުރާމައަކުން ދުނިޔޭގެ މުހިންމު ހަކަތައިގެ މަގުތަކަށް ހުރަސްއެޅި، ތެލާއި ގޭހުގެ އަގުތައް އުފުލިގެން ހިނގައިދާނެއެވެ.

ކަރަންޓު އުފެއްދުމާއި ދުވަހުން ދުވަހަށް ދަތުރުފަތުރުފަދަ އެންމެހާ ކަންކަމަށް ތެލަށް ބަރޯސާވެފައިވާ ދިވެހިރާއްޖެއަށް، މިފަދަ ހާލަތެއްގައި ނުރައްކާ ބޮޑެވެ. ކަރަންޓު ބިލުތައް ބޮޑުވެ، ތެލުގެ އަގު މައްޗަށް ގޮސް، އަދި މުދަލާއި ޚިދުމަތްތަކުގެ އަގުތައް ބޮޑުތަނުން އުފުލިގެންދާނެއެވެ. ފައިސާގެ އަގު ދަށްވެ، ގޭބިސީތަކަށް މީގެ އަސަރު ވަރަށް އަވަހަށް ކުރަން ފަށާނެއެވެ.

ޤައުމުގެ އިޤްތިޞާދުގެ މައިނާރު ގޮތުގައި އޮތް ފަތުރުވެރިކަމުގެ ދާއިރާއަށްވެސް މީގެ ނުރައްކާ ކުރިމަތިނުވެ ނުދާނެއެވެ. ތެލުގެ އަގު މައްޗަށް ދިއުމުން ޖުމްލަގޮތެއްގައި ފަތުރުވެރިން ކުރަންޖެހޭ ޚަރަދުތައް ބޮޑުވެ އެކަމުގެ ސަބަބުން ފަތުރުވެރިން އަންނަ މިންވަރު މަދުވެ، ޖީ.ޑީ.ޕީ އާއި އާންމު އާމްދަނީ ދަށަށް ދިއުމަށް މަގުފަހިވެގެންދާނެއެވެ.

ދުނިޔޭގެ ތާރީޙުގައި ހިނގި ދެ ބޮޑު ހަނގުރާމައިގެ ދުވަސްވަރު ދިމާވި ކާބޯތަކެތީގެ ދަތިކަމާއި އުނދަގޫތައް ހަނދާން ނެތްކަމުގައި ވިޔަސް މިކަމުގެ އިންޒާރުގެ ނިޝާންތައް ސާފުކޮށް ފެންނަން އެބަހުއްޓެވެ. އޭރުގެ ބައެއްމީހުން ފާހަގަކުރި ގޮތުގައި ދިރިހުރުމަށް ގަސްގަހުގެ ފަތް ކައިގެންވެސް އުޅުނު ޒަމާނެއްވެސް ދިޔަކަމަށްވެއެވެ. އަޅުގަނޑުމެން އެހާ ހިސާބަށް ދިއުމަށް މަޑުކޮށްގެން ތިބެގެން ނުވާނެއެވެ. އޭގެކުރިން ރައްކާތެރިކަމުގެ ފިޔަވަޅުތައް އަޅުއްވާށެވެ. ޔަޤީންކަން ނެތް ކަންކަމަށް ތައްޔާރުވާށެވެ. ވިސްނުންތެރިކަމާއެކު ޚަރަދުކުރާށެވެ. ޖުމްލަ ޚަރަދުތައް ކުޑަކޮށް އިތުރަށް ރައްކާކުރާށެވެ. ދުނިޔެ ބަދަލުވަމުން އަންނަނީއެވެ. އަޅުގަނޑުމެން އެންމެން މިކަމަށް ތައްޔާރުވާންޖެހެއެވެ.