މި ހަފުތާ ބަންދުގައި އައްޝައިޚް ޢަބްދުއްސަލާމް ދާވޫދު އަދި އައްޝައިޚް މުޖުތަބާ ޙަމީދު ދ.އަތޮޅުގެ 3 ރަށަކަށް ވަޑައިގަތުމަށް ވަނީ ހަމަޖެހިފައެވެ. އެގޮތުން މިރޭ ދ.ކުޑަހުވަދޫއަށް ވަޑައިގަންނަވާނެއެވެ. މިއީ ޖަމްޢިއްޔަތުއް ސަލަފުގެ "ހަފުތާ ބަންދު ދަރުސް" ޕްރޮގުރާމުގެ ތެރެއިން މި ހަފުތާ ބަންދުގައި ދ.އަތޮޅުގެ ބައެއް ރަށްތަކުގައި ހިންގޭ ދަރުސް ޕްރޮގުރާމުތަކެއް ކުރިއަށް ގެންދިއުމަށް ކުރަށްވާ ދަތުރެކެވެ.

ދ.އަތޮޅުގެ 3 ރަށެއްގައި ހިންގޭ ދީނީ ދަޢުވަތުގެ ޕްރޮގުރާމުތަކުގެ އިތުރުން ތަރުބަވީ ޕްރޮގުރާމުތަކުގައި ޝައިޚުން ބައިވެރިވެ ވަޑައިގަންނަވާނެއެވެ. އެގޮތުން މި ދަތުރުގެ ޕްރޮގުރާމުތައް، ދ.ކުޑަހުވަދޫގެ އިތުރުން ދ.މާއެނބޫދޫ އަދި ދ.ހުޅުދެލީގައި ކުރިއަށް ދާނޭކަމަށް، ޕްރޮގުރާމުތައް އިންތިޒާމުކުރުމުގައި އިސްކޮށް އުޅުއްވާ ފަރާތެއްކަމުގައިވާ ޔުނައިޓެޑު އިސްލާމިކް ސޮއިޓީގެ ރައީސް އަލްފާޟިލް އިސްމާޢީލް އާދިލް މަޢުލޫމާތު ދެއްވިއެވެ. އޭނާ އިތުރަށް ވިދާޅުވީ، ދ.އަތޮޅުގެ 3 ރަށުގައި ކުރިއަށް ގެންދެވޭ މިޙަރަކާތްތަކަކީ ރަށްރަށުގެ ކައުންސިލުތަކުގެ އިތުރުން ޖަމްޢިއްޔާތަކުން އެއްބާރުލުން ދީގެން ކުރިއަށް ގެންދެވޭ ޙަރަކާތްތަކެއް ކަމުގައެވެ. އެގޮތުން ހުޅުދެލީގެ ހިޔާ ޖަމްޢިއްޔާ ގެ އިތުރުން އެރަށުގެ ހިއްސާ ޖަމްޢިއްޔާއިންވެސް ބައިވެރިވެއެވެ.

މި ދަތުރުގެ އެންމެ ޚާޢްޞަ އެއް ޙަރަކާތް މާދަމާ ރޭގައި ހުޅުދެލީގައި ކުރިއަށްދާނެއެވެ. އެއީ އައްޝައިޚް ޢަބްދުއްސަލާމް ދެއްވާ ޚާއްޞަ ދަރުހެވެ. މަޥްޟޫޢުއަކީ "ހިނދުކޮޅެއް" ކެވެ.

ޖަމްޢިއްޔަތުއް ސަލަފުގެ ފަރާތުން ކޮންމެ ހަފުތާއަކުު ބަންދާ ދިމާކޮށް ރާއްޖޭގެ އެކި ކަންކޮޅުތަކުގައި ދީނީ ހޭލުންތެރިކުރުވުމުގެ ޙަރަކާތްތައް ކުރިއަސް ގެންދެއެވެ.