ތިޔައީ ރަޙުމާއި ކުލުނާއި އޯގާތެރިކަމުން ފުރިގެންވާ ހިތްތަކެކެވެ. ނަފުސަށް ޖެހިދާނެ ބަލިމަޑު ކަމަކަށްވެސް ފަސް ޖެހުމެއް ނެތި، ކެތްތެރިކަމާއިއެކު ތިޔަ ކުރައްވާ މަސައްކަތަކީ ދީނީ އަދި ޤައުމީ ބުރަ ބޮޑު މަސައްކަތެކެވެ. އިޚްލާޞްތެރި ކަމާއެކު ތިޔަކުރައްވާ މަސައްކަތުގެ  އަޖުރު، اللهގެ ޙަޟުރަތުގައި އިންތިހާއަށް އުފުލިގެންދާނެ ކަމާމެދު ޝައްކެއް ނުކުރެވެއެވެ. 

އިސްލާމީ ތާރީޚް ދުށް އެންމެ ފުރަތަ މުސްލިމު ނަރުހަކީ އައްސައްޔިދާ ރުފައިދާ ރަޟިޔަﷲ ޢަންހާއެވެ. އެކަމަނާގެ ބޭސްވެރިކަމުގެ ހުނަރާއި، ޢިލްމީ ޤާބިލުކަމަށް މިއުއްމަތުގެ މާތް ނަބިއްޔާ މުޙައްމަދު صلّى اللّـه عليه وسلّم  ވަނީ އިޢުތިރާފުވެވަޑައިގެންފައެވެ. އެކަލޭގެފާނު، އައްސައްޔިދާ ރުފައިދާ ރަޟިޔަﷲ ޢަންހާއަށް ޚާއްޞަ ފޭލިގެކޮޅެއް މަސްޖިދުއްނަބަވީގެ ކައިރީގައި ޖައްސަވައިދެއްވިއެވެ. ޒަމާނީ ޢިބާރާތުން ދަންނަވަނީ ނަމަ، ކުޑަ ކުލިނިކެއް ހައްދަވައި ދެއްވިއެވެ.

ޚަންދަޤު ހަނގުރާމައިގައި މާތް ރަސޫލާ صلّى اللّـه عليه وسلّم ގެ ނުހަނު އަރިސް ޞަޙާބީ ބޭކަލެއް ކަމުގައިވާ ސަޢުދު ބުނު މުޢާޒު ރަޟިޔަﷲ ޢަންހު ވަރަށް ބޮޑަށް ޒަޚަމްވެވަޑައިގެންނެވިއެވެ. އެލޭގެފާނަށް ސަޢުދުގެ ޙާލުކޮޅު ފެނިވަޑައިގެން ވަރަށް ބޮޑަށް ހިތާމަފުޅު ކުރެއްވިއެވެ. މާތް ރަސޫލާ صلّى اللّـه عليه وسلّم  ސަޢުދުގެފާނަށް ފަރުވާ ދެއްވުމަށްޓަކައި ޙަވާލު ކުރެއްވީ އައްސައްޔިދާ ރުފައިދާ ރަޟިޔަﷲ ޢަންހާއަށެވެ. 

ވުމާއެކު ތިޔަ ކުރައްވަނީ ދުނިޔެއެއަށް ކައު ކުރެއްވި އެންމެ މާތް ސާހިބާ، އެކަމަކަށް ނުހަނު ތަރުޙީބުދެއްވި މަސައްކަތެކެވެ. 

ދުޢާއަކީ ނަރުހުން ތިޔަކުރައްވާ މަސައްކަތުގައި الله ތަޢާލާގެ މަތިވެރިވެގެންވާ ހެޔޮ ތަޢުފިޤު ދެއްވުމެވެ. ދުޅަހެޔޮ ޞިއްޙަތާއި ޢާފިޔަތުގެ ނިޢުމަތް މިންވަރު ކުރެއްވުމެވެ. ރައްކާތެރި ކުރައްވައި މަސައްކަތުގައި ބަރަކާތްލެއްވުމެވެ.  ފަސްޖެހުމެއް ނެތި އަބަދުމެ ސާބިތުކަންމަތީގައި ލެހެއްޓެވުމެވެ. އާމީން