ދ.އަތޮޅު ކައުންސިލުން މުވައްޒަފުންނަށް އަމަލީ ތަޖުރިބާ ހޯދައިދިނުމުގެ މަޤްޞަދުގައި އެކި ރަށްރަށަށް ދަތުރުތަކެއް ކުރަމުން ގެންދާ ކަމަށް އެ ކައުންސިލްގެ ސެކްރެޓަރީ ޖެނެރަލް ޢަބްދުއްރަޝީދު ޢަބްދުއްރައްޒާޤް މަޢުލޫމާތު ދެއްވައިފިއެވެ.

މި ދަތުރުތައް ފެށިފައިވަނީ 30 އޭޕްރީލް 2025 ވަނަ ދުވަހުގެ ހަވީރުއެވެ. މިހާތަނަށް ދަތުރު ކޮށްފައިވާ ބައެއް ރަށްތަކުގެ ތެރޭގައި ށ.ފުނަދޫ، ށ.މިލަންދޫ، ށ.މަރޮށި، ހއ.އުތީމު އަދި ހދ.ކުޅުދުއްފުށި ހިމެނެއެވެ.

ދަތުރުތަކުގެ މައިގަނޑު މަޤްޞަދުތަކުގެ ތެރޭގައި މުވައްޒަފުން މޯޓިވޭޓް ކުރުމާއި، އޮފީސް މާޙައުލުން ބޭރުން ތަފާތު ތަޖުރިބާތައް ކޮށްލުމުގެ ފުރުޞަތު ދިނުން ހިމެނެއެވެ. މީގެ އިތުރުން، މުވައްޒަފުންނަށް ތިއަރީގެ އިތުރުން އަމަލީ ގޮތުން އެކި ރަށްރަށުގައި ކަންކަން ކުރާ ގޮތް ބަލައި ދަސްކުރުމުގެ ފުރުޞަތު ލިބިގެންދާކަމަށް އެސްޖީ ޢަބްދުއްރަޝީދު ވިދާޅުވިއެވެ.

"އަޅުގަނޑުމެންގެ ތެރޭގައި ވެސް ގަބޫލުކުރެވިފައި އޮންނަ ކަމެއް އެއީ ކައުންސިލުތަކުން ކުރާ ބޭކާރު ކަމެކޭ މިފަދަ ތަޖުރިބާ ދަތުރުތަކަކީ. އެހެންނަމަވެސް އަޅުގަނޑަށް ޤަބޫލުކުރެވޭ ގޮތުގައި މިއީ ވަރަށް ކާމިޔާބު ދަތުރެއް. ކައުންސިލުތަކަކީ އަމިއްލަ އިންޑިޕެންޑެންޓް ބޮޑީތަކެއް. އަޅުގަނޑުމެންނަށް އެންމެ ބޮޑު އެޑްވާންޓޭޖަކީ ތަޖުރިބާކުރެވި ދަސްކުރާ ކަންތައްތައް އަޅުގަނޑުމެންނަށް މާދަމާވެސް އިމްޕްލިމެންޓް ކުރުމުގެ ބާރު އޮތުން،" އެސްޖީ ޢަބްދުއްރަޝީދު ވިދާޅުވިއެވެ.

މި ދަތުރުތަކުން އެކި ކައުންސިލުތަކުގައި މުވައްޒަފުން މޯޓިވޭޓްކުރަން ގެންގުޅޭ ތަފާތު ގޮތްތަކާއި، ވަރކިންގ ސްޓޭޝަންތައް ތަރުތީބުކޮށްފައިވާ ގޮތްތައް ދަސްކުރުމުގެ ފުރުޞަތު ލިބިގެންދިޔަކަމަށް އެސްޖީ ފާހަގަކުރެއްވިއެވެ. އަދި މި ދަތުރުތަކުގެ ސަބަބުން މުވައްޒަފުންގެ މެދުގައި އޮންނަ އެއްބައިވަންތަކަން އިތުރަށް ހަރުދަނާވެގެން ދިޔަކަމަށްވެސް ވިދާޅުވިއެވެ.

ނަމަވެސް، މިފަދަ ދަތުރުތައް ކޮންމެ އަހަރަކު ކުރަންޖެހޭ ކަމެއްގެ ގޮތުގައި ދެކިގެން ކުރާނަމަ، އެއީ ބޭކާރު ކަމެއްގެ ގޮތުގައި ސިފަކުރެވިދާނެކަމަށް އެސްޖީ ޢަބްދުއްރަޝީދު ވިދާޅުވިއެވެ. އަދި ހަމައެހެންމެ ދަތުރުގައި ދެވުނު ރަށްތަކުން ވަރަށް ފުރިހަމަ މެހެމާންދާރިއެއް ލިބިގެންދިޔަކަން ފާހަގަކޮށް އެފަރާތްތަކަށް ވަރަށް ޚާއްސަ ޝުކުރެއްވެސް އަދާކޮށްފައިވެއެވެ.