ކުޑަހުވަދޫ ބޮޑުޢީދު ފުޓްސަލް ޗެލެންޖުގެ މީޑިއާ ޕާޓްނަރަކަށް ވޮއިސް ސްޕޯޓްސް ހަމަޖައްސައިފިއެވެ. މި މުބާރާތަކީ ބުރަދާސް އެކަޑަމީއިން ބޮޑުޢީދުގައި ބޭއްވުމަށް އަންނަ މުބަރާތެކެވެ.

ވޮއިސް އޮފީހުގައި އިއްޔަ ބޭއްވުނު ސޮއިކުރުމުުގެ ރަސްމިއްޔާތުގައި ބުރަދާސް އެކަޑަމީގެ ފަރާތުން ބައިވެރިވެފައިވަނީ ވައިސް ޗެއާޕާސަން މުޙައްމަދު އަމްޖަދު އެވެ. އަދި ވޮއިސް ސްޕޯޓްސްގެ ފަރާތުން އެއްބަސްވުމުގައި ސޮއިކުރީ މެނޭޖިންގ އެޑިޓަރ ޢަބްދުالله ޙުސައިން އެވެ.

ވޮއިސް ސްޕޯޓްސް އަކީ ރާއްޖޭގެ ގިނަ މުބާރާތްތަކެއްގެ ޚަބަރުތައް ތާޒާކަމާއިއެކު ފޯރުކޮށްދެމުންއަންނަ މީޑިއާއެކެވެ. ބުރަދާސް އެކަޑަމީގެ ޗެއާމަން އިސްމާޢީލް އާދިލް ކުޑަހުވަދޫ އޮންލައިން އަށް މަޢުލޫމާތު ދެއްވަމުން ފާހަގަކުރަށްވާފައިވަނީ، މި މުބާރާތުގެ މަޢުލޫމާތު އެންމެ ތާޒާކޮށް މީޑިއާއަށް ގެނެސްދިނުމަށް ވޮއިސް އަކީ އެންމެ ޤާބިލު އެއް ފަރާތް ކަމުގައެވެ. ވޮއިސް މީޑިއާ ޕާޓްނަރ އަށް ވުމަކީ މުބާރާތަށް އިތުރަށް ލިބުނު ފުރިހަމަކަމެއްކަން ފާހަގަކުރަށްވަމުން ވޮއިސްގެ ޓީމަށް އާދިލް ވަނީ ޝުކުރުދަންނަވާފައެވެ.

މުބާރާތުގެ އެންމެ ފުރިހަމަކޮށް ކުރިއަށް ގެންދިއުމަށް ބުރަދާސް އެކަޑަމީގެ ފަރާތުން އަންނަމީ މަސައްކަތްކުރަމުންނެވެ. "މީޑިއާ ޕާޓްނަރުންގެ އިތުރުން، އިތުރު ފަރާތްތަކާއި ގުޅިގެން ފޯރިގަދަ މުބާރާތަކަށް މި މުބާރާތް ހެދުމަށް މިއަންނަނީ ގިނަގުނަ މަސައްކަތް ކުރަމުން" އާދިލް ވިދާޅުވިއެވެ.

މުބާރާތުގެ ޗެމްޕިއަން ޓީމަށް 25000 ރުފިޔާ އަދި ރަނަރަޕް ޓީމަށް 12000 ރުފިޔާ ކަނޑައެޅިފައިވާއިރު، ކުޑަހުވަދޫ ބޮޑުޢީދު ފުޓްސަލް ޗެލެންޖު 1446، ފެށޭނީ 6 ޖޫން 2025 ގައެވެ. މި މުބާރާތުގެ ސަބަބުން ޢީދުގެ ފޯރި ގަދަވެ ކުޑަހުވަދޫގެ ޒުވާނުންނަށް އެކުޅުންތެރިންގެ ހުނަރު މުޅި ރާއްޖެއަށް ދައްކައިލުމުގެ ފުރުޞަތު ލިބިގެންދާނެއެވެ.