މާތްﷲ ސުބްޙާނަހޫ ވަތަޢާލާއީ އެންމެ ދީލަތިވަންތަ ރަސްކަލާނގެއެވެ. އެކަލާނގެ އިސްމުފުޅު ތެރޭގައި الكَرِيْم ވެއެވެ. މާނައަކީ ދީލަތިވަންތައެވެ. މާތްﷲ އަކީ ނިމުމެއް ނެތް ދީލަތިވަންތަ ކަލާނގެއެވެ. އަޅުގަނޑުމެންނަށް ލިބިފައިމިވާ އެންމެހާ ނިޢުމަތްތަކާއި، ރިޒުޤު ފަހި ކޮށްދެއްވަނީ ހަމައެކަލާނގެއެވެ. އެގޮތުން އެކަލާނގެ އަޅުން ހައްދަވައި ބޮޑު ކުރައްވައި، އެތަކެއް ނިޢުމަތްތަކެއް ދެއްވައި، ދުނިޔޭގައި ފުރިހަމަ ސިއްޙަތެއްގައި އުޅުމުގެ ބާރުވެސް ދެއްވިއެވެ. އަދި ކިއެއްތޯއެވެ؟

އިންސާނާ ބަލިވުމުން އެބައްޔަށް ޝިފާވެސް ދެއްވަނީ ހަމައެކަލާނގެ އިރާދަފުޅާއި އެކުގައެވެ. އަޅުގަނޑުމެން ބަނޑުފުރާނަ މުއްތި ކޮއްދިނުމަށްޓަކައި އެކި ކުލަކުލައިގެ އެކި ވައްތަރުގެ މޭވާއާއި ތަރުކާރީއާއި ފުށާއި ހަނޑޫފަދަ ތަކެތިވެސް ދެއްވީ ހަމަ ދީލަތިވަންތަ މާތްﷲ ސުބްޙާނަހޫ ވަތަޢާލާއެވެ. އިންސާނާ ކަރުހިއްކުމުން ބޯނޭ ފެންވެސް ދެއްވެވީ ހަމައެކަލާނގެއެވެ. އިތުރުކަމަށް ބަލާލާއިރު އެކަލާނގެއީ އަޅަމެން އެންމެހާ އަޅުންގެ ފާފަ ގިނަގިނައިން ފުއްސަވާ ރަސްކަލާނގެއެވެ. މާތްﷲ ސުބްޙާނަހޫ ވަތަޢާލާ އަޅުގަނޑުމެންނަށް މިޚަބަރު ދެއްވަވާފައިވެއެވެ.

މާތްﷲ ސުބްޙާނަހޫ ވަތަޢާލާ ވަޙީ ކުރައްވާފައިވަނީ:-
۞ قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ ‎﴿٥٣﴾
މާނައީ:- ކަލޭގެފާނު ވިދާޅުވާށެވެ! އެއުރެންގެ އަމިއްލަ نفس ތަކުގެ މައްޗަށް ފާފައިން إسراف ކޮށްފައިވާ، ތިމަންރަސްކަލާނގެ އަޅުތަކުންނޭވެ! ތިޔަބައިމީހުން اللَّه ގެ رحمة ން އުންމީދު ކަނޑައިނުލާށެވެ! ހަމަކަށަވަރުން، اللَّه އީ، އެންމެހާ ފާފަތައްފުއްސަވާ ރަސްކަލާނގެއެވެ. ހަމަކަށަވަރުން، އެކަލާނގެއީ، ގިނަގިނައިން ފާފަފުއްސަވާ، رحيم ވަންތަ ރަސްކަލާނގެއެވެ.

އެކަލާނގެ ދީލަތިވަންކަމުން ދެއްވަވާ އެންމެހާ ނިޢުމަތްތަކަށް އަހަރެމެން ޝުކުރުވެރިވާންޖެހޭނެއެވެ.