ދ. ކުޑަހުވަދޫގައި ރަޝީދު ކާޕެންޓްރީ އެންޑް ކޮންސްޓްރަކްޝަން ކުންފުންޏާއި ކައުންސިލާ ގުޅިގެން ތަރައްޤީކުރާ 160 އެޕާޓްމަންޓުގެ ބިންގާއެޅުމުގެ ރަސްމިއްޔާތު މިއަދު ބޭއްވުމަށް ނިންމައިފިއެވެ.

މިއަދު ހަވީރު އެއަރޕޯޓް އާއި ކައިރިން ހިއްކި ސަރަޙައްދުގައި، 17:00 ގައި ބޭއްވުމަށް ހަމަޖެހިފައިވާ މި ރަސްމިއްޔާތަށް ރަށުގެ އެންމެހާ ރައްޔިތުންނަށްވަނީ ދަޢުވަތު އަރުވާފައެވެ.

ކުޑަހުވަދޫގައި ތަރައްޤީކުރެވޭ ޓަވަރ ޓަކުގެތެރެއިން، ޓަވަރ އޭ މަޝްރޫޢުގެ ދަށުން ހަދާނީ 2 ބްލޮކްގެ 80 އެޕާޓްމަންޓެވެ. ކޮންމެ އެޕާޓްމަންޓެއްގެ އަގަކީ ޖީއެސްޓީއާ ނުލައި 1.5 މިލިޔަން ރުފިޔާއެވެ. މިއިން ކޮންމެ ޓަވަރެއްގައި 2 ލިފްޓް ހުންނާނެއެވެ. އަދި މި އެޕާޓްމަންޓްތަކުގައި 3 ކޮޓާރިއާއި 3 ފާޚާނާ ހުރެއެވެ.

ކުޑަހުވަދޫއަކީ ދިރިއުޅުމުގެ ވަޞީލަތްތައް ތަނަވަސް ތަޢުލީމު އުނގަންނައި ދިނުމަށް ފަހި ފުރުޞަތުތަކެއް އޮތް ރަށެކެވެ. ރާއްޖޭގެ އެކި ކަންކޮޅުތަކުން މިހާރުވެސް ކުޑަހުވަދޫގައި ވަޒަންވެރިވެ ދިރިއުޅެމުންދާއިރު މި މަޝްރޫޢުގެ ސަބަބުން އިތުރު ފަރާތްތަކަށް ފުރުޞަތު ލިބިގެންދާނެއެވެ.